Basler-Fasnachts-Zeedel 2016 vo de «Gääle Daggel»
Aapasst uf d’Solethurner Panther vo dr Irène Privé
Vorgetragen vom „Chlyne Pantherli“ anlässlich der GV 2018
E Gruppe git’s, wo unterschtützt und im Auter dir au nützt
„Thirty Shades of Grey“
Gsesch nümm guet und ghörsch nümm guet und chasch nümm ganz schnäu loufe?
Hesch für’s Zytigläse dir e Brüue müesse choufe?
Loht ’s Gedächtnis no, duesch Züg vrgässe, duesch dr Bluetdruck mässe
und scho mängi Püue frässe?
Zwickt dr Rügge und ou d’Chnöi? Hei dyny Hoor e „Shade of Grey“?
Denn isch’s so wyt, du merksch es baud,
du bisch nümm jung, nei, jetz wirsch aut.
Lang ha-n-i das ganz guet vrdrängt, as Öuterwärde gar nie dänkt,
ha gmeint, i blyby ewig knackig, geischtig fit und physisch zackig.
Sit churzem weiss i’s jetz genau: i bi nümm grien – i bi jetz grau:
Do schtoh-n-i doch im Bus und lach‘ – so wie-n-i das doch immer mach‘ –
e junge Ma aa, wo dört sitzt – er lächlet zrugg, so ganz vrschmitzt –
und seit mr sanft – Madame hallo – „sitzet ane, i cha schtoh!“
E Schock isch’s gsi! I säg’s nid gärn, aber z’lüüge lyt mr färn:
Si sy vrby, die junge Joor, und plötzlech chumm i aut mir vor.
Merksch plötzlech, dass’s nümme so lang goht, bis s’Auter vor dr Türe schtoht?
Wie lang bisch de scho nümm go tanze? Sit wenn hesch du dä Wouschtandsranze?
„Weisch no früecher?“, ghörsch dy froge — das sy Zeiche – dasch nid gloge.
Aber muesch nid trurig sy, ’s Läbe isch no nid vrby.
E Gruppe git’s, wo unterschtützt und im Auter dir ou nützt.
‚S sy aues Auti y däm Clan … und no aktiv, es isch dr Wahn.
„Graui Panther“ heisst das Chörli – gä tuet’s die scho ganz mängs Jöhrli.
Föifezwänzg Johr scho graui Chatze mit scharfe Chraue a de Tatze.
Mitglid wärde, sett ganz schnäu, wär graui Schträhnli hett im Fäu.
D’Mitglidschaft isch gar kei Froog, denn ’s Auter wird zur ächte Ploog,
wenn nid Lüt hesch, wo chasch troue – syges Manne oder Froue -,
wo di umgäh – ou y dr Not – und zämeblybe bis zum Tod.
Doch eis Thema bruucht no e Berootyg: Wie gseht’s de us mit dr Erotik?
‚S git doch im Auter ou no Daggle, wo gärn mit ihrem Schwänzli gwaggle.
Sex and Drugs and Rock’n’Roll findet me ou im Auter toll.
Vibra – schtatt so Rolatore – ohni Schamröti a de-n-Ohre!
Schtatt Bandage gärn Bondage – ça me plaît, même à mon age!
Drum müesse d’Panther duresetze, dass niemer gäge das tuet hetze,
dass die Junge nid tüe schimpfe und drwäge ’s Näsli rümpfe.
‚S git haut eifach schöni Sache, wo me bis zum Tod cha mache.
Wünsch gub’s no unändlech vüu – doch jede-n-öpis angers wüu –
drum haut i jetz dr Schnabu zue und gibe ganz schnäu wider Rue!